Shkodra feston Ditën Botërore të Kafshëve me thirrje për Adoptim

Në Shkodër u zhvillua një aktivitet i veçantë me rastin e Ditës Botërore të Kafshëve, ku u përcollën thirrje për më shumë dashuri dhe përgjegjësi ndaj miqve me putra. Vullnetarë të strehëzave të qenve ndanë përvojat dhe përkushtimin e tyre të përditshëm, duke vënë në pah rëndësinë e kujdesit dhe adoptimit të kafshëve. Joni Kopliku, veteriner, u shpreh se ka konstatuar një rritje të vëmendjes dhe informimit të qytetarëve lidhur me kujdesin ndaj kafshëve shtëpiake. Nga ana tjetër, Sokol Malaj, Drejtor i Shërbimit Veterinar pranë Bashkisë Shkodër, theksoi punën që po bëhet për sterilizimin dhe mikroçipimin e kafshëve, si dhe njoftoi hapjen e një strehe të re, krahas dy ekzistueseve. Ky aktivitet u mbyll me një apel të qartë për qytetarët: të tregojnë më shumë kujdes, dashuri dhe të shtojnë numrin e adoptimeve, duke u dhënë kafshëve jo vetëm një strehë, por edhe një familje të vërtetë.