Vllaznia përballë Elbasanit në Superiore: Esat Mala beson te fitorja

Java e gjashtë e Kategorisë Superiore rezervon një përplasje mes kryesuesish. Vllaznia do të ndeshet me Elbasanin, skuadër që aktualisht udhëheq kampionatin. Një fitore për kuqeblutë në duelin e së shtunës, që nis në orën 19:00 në stadiumin “Loro Boriçi”, do të nënkuptonte automatikisht vendin e parë në renditje. Kjo e bën këtë përballje të një rëndësie të veçantë për të dyja ekipet. Në konferencën për shtyp para ndeshjes, mesfushori kuqeblu, Esat Mala, u shfaq plot besim në arritjen e suksesit. Mala theksoi se ekipi ka punuar intensivisht gjatë javës për të përmirësuar defektet, veçanërisht lidhur me rastet e shumta që skuadra humbet para portës kundërshtare. Krahas ndeshjes Vllaznia-Elbasani, java e gjashtë e “Abissnet Superiore” përfshin edhe derbin e kryeqytetit Partizani-Tirana, si dhe duelet Dinamo-Flamurtari, Vora-Egnatia dhe Teuta-Bylis.