Kanadaja, Australia dhe Britania, njohje historike për shtetin e Palestinës

Kanadaja, Australia dhe Britania e Madhe kanë shpallur sot njohjen zyrtare të shtetit të Palestinës, duke shënuar një hap të madh diplomatik në mbështetje të zgjidhjes me dy shtete për konfliktin izraelito-palestinez. Lëvizja u bë publike gjatë Asamblesë së Përgjithshme të Kombeve të Bashkuara në Nju Jork, si pjesë e një përpjekjeje të koordinuar ndërkombëtare. Kanadaja u bë vendi i parë i grupit G7 që ndërmori këtë hap. Kryeministri Mark Carney deklaroi se nga sot Kanadaja njeh shtetin e Palestinës, duke ofruar partneritet për paqe dhe bashkëjetesë mes palestinezëve dhe izraelitëve. Pak më pas, kryeministri australian Anthony Albanese shpalli njohjen nga Australia, duke e cilësuar këtë vendim si pjesë të një përpjekjeje të përbashkët me Kanadanë dhe Britaninë e Madhe për të mbështetur një zgjidhje të qëndrueshme. Edhe kryeministri britanik Keir Starmer konfirmoi përmes një deklarate video se Britania e Madhe njeh zyrtarisht Palestinën. Ai theksoi se ky vendim nuk është shpërblim për Hamasin, por një përpjekje për të mbajtur gjallë mundësinë e paqes dhe zgjidhjes me dy shtete. Starmer kërkoi gjithashtu lirimin e menjëhershëm të pengjeve të mbajtura nga Hamasi në Gazë. Këto tre njoftime shënojnë një moment kthese në politikën ndërkombëtare, duke rritur pritshmëritë për një proces të ri paqeje në Lindjen e Mesme.