Mariana Koçeku dënon dhunën ndaj protestuesve: Çdo goditje e bën edhe më të qartë pse njerëzit qëndrojnë në shesh

Deputetja e pavarur Mariana Koçeku ka reaguar pas episodeve të dhunës gjatë protestës në Tiranë, duke dënuar goditjet ndaj protestuesve dhe duke theksuar se këto pamje shtojnë motivet për të vazhduar protestën.

Në deklaratën e saj, Koçeku kujton se protestat morën përmasa masive pasi një qytetar u tërhoq zvarrë, ndërsa këtë herë, sipas saj, një tjetër protestues u godit në sy.

„Herën e parë protestat shpërthyen masivisht se u mor zvarrë një njeri. Sot pamë një tjetër njeri që u godit në sy. E dëgjuam edhe britmën e tij“, shkruan deputetja.

Koçeku akuzon pushtetin se po e përdor trupin e qytetarit si mjet për të përhapur frikë, ndërsa nënvizon se dhuna ndaj protestuesve nuk e zbeh reagimin qytetar.

„Pushteti vazhdon të e trajtojë trupin e qytetarit si vendin ku duhet të ngulitet frika. Por çdo goditje ndaj një protestuesi e bën edhe më të qartë pse njerëzit vazhdojnë të qëndrojnë në shesh“, përfundon reagimin e saj deputetja e pavarur.