Filluan hetimet për rrëzimin e një helikopteri ushtarak italian në Bosnjë-Hercegovinë, i cili shkaktoi vdekjen e katër personave.
Filluan hetimet për rrëzimin e një helikopteri ushtarak italian të tipit „Chinook“, në Bosnjë-Hercegovinë, që shkaktoi vdekjen e katër personave dhe plagosjen e 11 të tjerëve.
Në bordin e helikopterit ndodheshin 15 persona, pjesë e misionit ndërkombëtar EUFOR Althea.
Mes viktimave janë dy ushtarakë të ushtrisë italiane dhe dy pjesëtarë të Kryqit të Kuq.
Sipas dëshmitarëve, helikopteri po fluturonte në lartësi të ulët, kur papritur nisi të rrotullohej në ajër dhe u rrëzua në një zonë rurale pranë fshatit Gorica.
Fatmirësisht, zona ishte e pabanuar dhe nuk pati viktima civile. Shkaqet e aksidentit mbeten ende të paqarta.
Ndër hipotezat paraprake është edhe mundësia e përplasjes me kabllo të tensionit të lartë.
Autoritetet italiane dhe EUFOR kanë nisur hetimet për zbardhjen e plotë të ngjarjes.
Në vendngjarje ndërhynë ekipet e emergjencës, zjarrfikësit dhe forcat ushtarake.
Ndërkohë, Ministria italiane e Mbrojtjes ka dërguar një ekip mjekësor për të garantuar trajtimin e të plagosurve.
Ngjarja ka shkaktuar reagime dhe mesazhe ngushëllimi nga krerët më të lartë të shtetit italian, përfshirë presidentin Sergio Mattarella dhe kryeministren Giorgia Meloni, të cilët shprehën solidaritet me familjet e viktimave dhe të plagosurit.
Kryeministrja italiane, Giorgia Meloni, nderoi kujtimin e katër ushtarakëve italianë që humbën jetën në Bosnjë, duke vendosur një buqetë me trëndafila në Circus Maximus, në Romë, së bashku me ministrin e Mbrojtjes, Guido Crosetto.
Në një mesazh të publikuar në rrjetet sociale, Meloni shprehu solidaritetin me familjet e viktimave, duke theksuar se asnjë fjalë nuk mund të zëvendësojë humbjen e tyre, por se qëndresa pranë atyre që vuajnë është një detyrim.
Në prag të 4 nëntorit, Ditës së Unitetit Kombëtar dhe të Forcave të Armatosura në Itali, është ngritur „Fshati i Mbrojtjes“ në Circus Maximus, i konceptuar edhe si një hapësirë përkujtimore e hapur për qytetarët.
Meloni u bëri thirrje italianëve të vizitojnë këtë hapësirë dhe të vendosin nga një lule në nderim të të rënëve, si shenjë dashurie, respekti dhe mirënjohjeje.
„Simone, Claudio, Franco, Adriano, Laura: nuk do t'ju harrojmë“, shkroi Meloni në mesazhin e saj.
