Kryeministri Edi Rama përsëriti ftesën për dialog ndaj studentëve dhe pedagogëve që vijojnë protestën, duke shprehur gatishmërinë e qeverisë për të shqyrtuar propozimet e tyre dhe për të adresuar shqetësimet e ngritura.
Nga Redaksia
· 1 min lexim
Kryeministri Edi Rama përsëriti edhe këtë të hënë ftesën për dialog ndaj studentëve dhe pedagogëve që vijojnë protestën, duke shprehur gatishmërinë e qeverisë për të shqyrtuar propozimet e tyre dhe për të adresuar shqetësimet e ngritura.
Rama ndau në rrjetet sociale një pamje nga sofra e gurtë e vendosur përpara godinës së Kryeministrisë me mbishkrimin „Dialog“.
Megjithatë, deri më tani, protestuesit kanë refuzuar ftesën, duke kërkuar dorëheqjen e Kryeministrit, ndërsa kanë paralajmëruar vazhdimin e protestës.
Në vazhdim, Kryeministri ka deklaruar se është i gatshëm të shqyrtojë çdo propozim të studentëve dhe pedagogëve, ndërsa qeveria po përgatit një paketë masash për t'iu përgjigjur nevojave të tyre, me qëllim që dëgjimi i qytetarëve të përkthehet në vendimmarrje dhe mbështetje konkrete.
Dy ditë më parë u zhvilluan përsëri protesta përpara Ministrisë së Arsimit dhe Kryeministrisë, ku pati edhe akte dhune dhe përplasje mes policisë dhe protestuesve. Protestës iu bashkuan edhe deputetë dhe anëtarë të Partisë Demokratike.
Burimi: Ora News
