Federata Mbretërore Spanjolle e Futbollit ka shtyrë të gjitha 24 ndeshjet e raundit të parë të Kupës së Mbretit, të planifikuara për këtë të mërkurë, si shenjë respekti ndaj viktimave të përplasjes së dy trenave në provincën e Toledos.
Federata Mbretërore Spanjolle e Futbollit (RFEF) ka vendosur të shtyjë të gjitha 24 ndeshjet e raundit të parë të Kupës së Mbretit, të planifikuara për t'u zhvilluar këtë të mërkurë në Spanjë.
Vendimi u mor pas përplasjes së dy trenave me shpejtësi të lartë në provincën e Toledos, një ngjarje tragjike që ka tronditur vendin.
Sipas federatës, shtyrja e ndeshjeve të planifikuara gjatë ditës dhe në mbrëmje përfaqëson një shenjë respekti dhe solidariteti me viktimat e aksidentit dhe familjet e tyre. RFEF njoftoi se datat e reja të zhvillimit të takimeve dhe oraret përfundimtare do të bëhen të njohura në ditët në vijim.
Ndër skuadrat që pritej të fillonin rrugëtimin në këtë edicion të Kupës së Mbretit ishin ekipet e La Ligës, si Valencia, Celta Vigo dhe Real Betis. Ndërkohë, Real Madrid dhe Barcelona do të hyjnë në garë në muajin dhjetor, duke nisur nga faza e 1/16-ve, për shkak të pjesëmarrjes së tyre në Superkupën e Spanjës.
Aksidenti hekurudhor ndodhi pak pas orës 09:00, mes qyteteve Mora dhe Orgaz, në provincën e Toledos. Në përplasjen e rëndë u përfshinë dy trena me shpejtësi të lartë, të operatorëve Renfe dhe Iryo, të cilët udhëtonin nga Madridi drejt Seviljes. Në të dy trenat ndodheshin gjithsej 544 persona.
Sipas një përfaqësuesi të autoriteteve të komunitetit autonom të Kastiljes-La Mançës, nga aksidenti dolën nga shinat dy vagona. Në kohën e raportimit, të paktën 46 persona dyshohej se kishin humbur jetën, ndërsa autoritetet lokale njoftuan se numri i viktimave mund të rritej.
Pas tragjedisë, Real Madrid dhe Atletico Madrid shprehën ngushëllimet për familjet e viktimave, të plagosurit dhe të gjithë personat e prekur nga kjo ngjarje e rëndë.
