Projektbuxheti 2027, shpenzime mbi 10 miliardë euro, dyfishohet bonusi i pensionistëve

Ministri i Financave, Petrit Malaj, prezantoi projektbuxhetin e vitit 2027 dhe paketën e re fiskale, duke njoftuar rritje të mbështetjes për pensionistët, familjet me fëmijë dhe arsimin. Shpenzimet e parashikuara në buxhet kalojnë 10 miliardë euro.

Gjatë prezantimit në mbledhjen e Konferencës së Kryetarëve, Malaj theksoi se projektbuxheti është hartuar mbi analiza makroekonomike dhe parashikime fiskale, me synimin për të garantuar rritje të qëndrueshme ekonomike, konsolidim të financave publike dhe ruajtjen e ekuilibrit mes të ardhurave dhe shpenzimeve.

Sipas ministrit, të ardhurat buxhetore për vitin 2027 parashikohen në 907.9 miliardë lekë, ose 30.9% e Prodhimit të Brendshëm Bruto (PBB). Ai bëri të ditur se të ardhurat totale pritet të jenë rreth 56 miliardë lekë më të larta se në vitin 2026.

Nga 1 janari rriten pagat e policëve, ja sa lekë më shumë do të marrin efektivët e rolit bazë dhe drejtuesit 29 Tetor, 09:15

„Shqipëria po financon zhvillimin pa rrezikuar stabilitetin“, deklaroi Malaj, duke nënvizuar se qeveria synon të vijojë konsolidimin fiskal dhe të përmirësojë standardin e jetesës së qytetarëve.

Pensionet dhe mbështetja për familjet

Një nga masat e njoftuara në projektbuxhet është indeksimi i pensioneve në prill 2027. Gjithashtu, sipas ministrit, bonusi për pensionistët do të dyfishohet, me një fond të parashikuar prej 20 miliardë lekësh.

Edhe bonusi i bebeve pritet të rritet në mënyrë progresive për fëmijët deri në moshën pesëvjeçare, në kuadër të masave për mbështetjen e familjeve.

Më shumë fonde për arsimin

Projektbuxheti parashikon gjithashtu financime shtesë për arsimin dhe kërkimin shkencor. Sipas Malajt, prioritetet përfshijnë:

– 1.1 miliardë lekë për rritjen e bursave për studentët nga familjet në nevojë;

– 400 milionë lekë shtesë për përmirësimin e infrastrukturës së arsimit bazë;

– 500 milionë lekë për programin mësimor pas orarit të shkollës (after school);

– 100 milionë lekë për kërkimin shkencor.

Harrojini paratë në dorë, ja si po paguhen faturat e energjisë në sportelet e OSHEE-së 29 Tetor, 07:39

Ministri deklaroi se këto investime synojnë përmirësimin e kushteve në arsim dhe forcimin e lidhjes mes dijes dhe zhvillimit ekonomik të vendit.

Synimi: Shqipëria në BE deri në vitin 2030

Malaj theksoi se projektbuxheti për periudhën 2027–2029 pasqyron prioritetet e qeverisë për zhvillim të qëndrueshëm, financa publike të shëndosha dhe një Shqipëri më sociale.

Ai nënvizoi gjithashtu se përmbushja e objektivit për anëtarësimin e Shqipërisë në Bashkimin Evropian deri në vitin 2030 mbetet një nga drejtimet kryesore të politikave qeveritare.

Projektbuxheti i vitit 2027, i miratuar nga Këshilli i Ministrave, është paraqitur në Konferencën e Kryetarëve dhe vijon procedurat parlamentare për shqyrtim dhe miratim.