Mbi 23 mijë transaksione elektronike janë kryer për pagesën e faturave të energjisë në zyrat e OSHEE-së gjatë vitit të parë të funksionimit të shërbimit përmes terminaleve POS, me vlerë totale rreth 1 milion euro.
Mbi 23 mijë transaksione elektronike janë realizuar për pagesën e faturave të energjisë elektrike në zyrat e Kujdesit ndaj Klientit të Furnizuesit të Shërbimit Universal (FSHU), pjesë e OSHEE Group, gjatë vitit të parë të funksionimit të shërbimit të pagesave përmes terminaleve POS.
Sipas të dhënave të OSHEE, vlera totale e faturave të shlyera përmes kësaj mënyre pagese ka arritur në rreth 1 milion euro, që nga nisja e shërbimit në tetor të vitit të kaluar.
Pagesat elektronike me kartë bankare u paraqitën më 1 tetor 2025, në fillim si projekt pilot në Tiranë. Në atë periudhë, OSHEE njoftoi se terminalet POS do të pranonin kartat e të gjitha bankave, pa tarifa shtesë për abonentët, ndërsa shërbimi do të zgjerohet gradualisht në qytete të tjera.
Në këtë moment, sipas të dhënave të kompanisë, kjo mënyrë pagese ofrohet në të gjitha pikat e Kujdesit ndaj Klientit, duke i dhënë mundësinë abonentëve të shlyen detyrimet për energjinë elektrike pa përdorur para në dorë.
Procesi fillon me verifikimin e detyrimeve të abonentit në sistemin e FSHU-së. Punonjësi i shërbimit regjistron shumën në terminalin POS, ndërsa klienti përfundon transaksionin duke përdorur kartën bankare ose një pajisje që mbështet pagesat pa kontakt përmes portofolit digjital.
Pasi transaksioni miratohet, sistemi gjeneron konfirmimin elektronik të pagesës. Sipas OSHEE, shërbimi synon të thjeshtojë procedurën e arkëtimit dhe të zvogëlojë kohën e pritjes në sportele.
Zgjerimi i pagesave përmes terminaleve POS është pjesë e procesit të digjitalizimit të shërbimeve të OSHEE Group, i cili përfshin edhe kanale të tjera për shlyerjen e faturave të energjisë elektrike.
Përveç pagesave në sportele, abonentët mund të përdorin aplikacionin e OSHEE-së, faqen zyrtare të kompanisë dhe platformën e-Albania për pagesat online. Faturat mund të shlyhen gjithashtu përmes bankave të nivelit të dytë, Postës Shqiptare dhe pikave të transferimit të parave.
Ndryshe nga pagesat përmes terminaleve POS, të cilat realizohen fizikisht në zyrat e shërbimit, platformat digjitale të OSHEE-së mundësojnë kryerjen e pagesave në distancë, gjatë 24 orëve të ditës.
