Lista Studentore Studentët fitojnë ka siguruar fitoren në zgjedhjet e jashtëzakonshme parlamentare në Serbi me 52.1% të votave, sipas rezultateve paraprake të CeSID, duke lënë pas listën e Aleksandar Vuçiçit me 39.3%.
Lista Studentore „Studentët fitojnë“ ka arritur fitoren në zgjedhjet e jashtëzakonshme parlamentare në Serbi, sipas rezultateve paraprake të publikuara nga organizata për monitorimin e zgjedhjeve, CeSID.
Sipas këtyre të dhënave, Lista Studentore ka marrë 52.1 për qind të votave, duke e lënë pas listën „Aleksandar Vuçiç – Serbia e Bashkuar“, e cila ka siguruar 39.3 për qind.
Edhe llogaritja paraprake e mandateve tregon një epërsi të qartë të studentëve, të cilët pritet të zotërojnë shumicën absolute në Parlamentin e ri të Serbisë.
Lista Studentore parashikohet të marrë 138 mandate nga 250 vende gjithsej, ndërsa lista e Vuçiçit 104 mandate.
Këto rezultate vijnë pas deklaratës së presidentit serb Aleksandar Vuçiç, i cili pranoi humbjen në zgjedhje, duke thënë se të dhënat paraprake tregonin një fitore të studentëve.
Më herët, Vuçiç deklaroi se Lista Studentore pritej të siguronte nga 135 deri në 140 mandate, ndërsa forca e tij politike rreth 105 vende në Parlament.
Pas publikimit të rezultateve paraprake, qindra qytetarë dolën në rrugët e Beogradit për të festuar.
Në kryeqytetin serb u ndezën flakadanë dhe u dëgjuan boritë e automjeteve, ndërsa në shtabin e Listës Studentore kandidatët dhe mbështetësit brohoritën „Fitore“.
Zgjedhjet e jashtëzakonshme parlamentare u zhvilluan të dielën, më 25 tetor, me pjesëmarrjen e 18 listave zgjedhore.
Rezultatet e CeSID janë paraprake dhe mbeten për t'u konfirmuar nga Komisioni Republikan Zgjedhor i Serbisë.
