Figura të njohura publike si këngëtarja Nora Istrefi, aktorja Arjola Demiri dhe floktari Kaci Lleshi u bashkuan protestës në Prishtinë për të kërkuar drejtësi për Arlinda Zekajn dhe përgjegjësi institucionale.
Disa personalitete të njohur i janë aderuar protestës të organizuar të mërkurën në Prishtinë, ku kërkohet drejtësi për Arlinda Zekajn dhe përgjegjësi institucionale për mangësinë në mbrojtjen e saj.
Në pamjet nga protesta në sheshin „Zahir Pajaziti“, dallojnë këngëtarja Nora Istrefi, floktari Kaci Lleshi dhe aktorja Arjola Demiri, të cilët kanë dalë për të manifestuar solidaritetin në një rast që ka shkaktuar reagime të gjerë në shoqëri.
Nora Istrefi kishte njoftuar më parë përmes rrjeteve sociale se do të merrte pjesë në protestë, duke kërkuar drejtësi për Arlindën dhe mbrojtje për çdo grua. Ajo kishte theksuar se gratë meritojnë të jetojnë të sigurta, pa frikë dhe të kthehen në shtëpitë e tyre pa u ekspozuar ndaj rrezikut.
Protesta është organizuar pas vrasjes së Arlinda Zekajt në Pejë, e cila, sipas raportimeve, u vra me sëpatë nga kunati i saj.
Protestuesit kërkojnë përgjegjësi nga institucionet shtetërore, pasi, sipas organizatorëve, viktima kishte kërkuar disa herë mbrojtje, por nuk e kishte marrë atë.
Nga sheshi „Zahir Pajaziti“, protestuesit pritet të marshojnë drejt institucioneve të vendit, përfshirë Ministrinë e Drejtësisë, Këshillin Prokurorial të Kosovës, Këshillin Gjyqësor të Kosovës, Policinë e Kosovës dhe Qeverinë.
Përmes kësaj proteste, kërkohet që vrasja e Arlinda Zekajt të mos mbetet pa përgjegjësi dhe që institucionet të marrin masa konkrete për parandalimin e dhunës ndaj grave dhe sigurimin e sigurisë së tyre.
