„Nuk do ta shohësh djalin sa të jem gjallë“ - Biseda të Arlinda Zekajt me ish-bashkëshortin: kërcënime vrasje

Prokuroria në Pejë ngriti aktakuzë për „kanosje“ ndaj Jeton Sylajt më 23 tetor, vetëm dy ditë para se Arlinda Zekaj të vritej nga kunati i saj.

Në dosjen e prokurorisë zbardhën kërcënimet, denoncimet në polici dhe përpjekjet e 49-vjeçares për të rikthyer pranë vetes djalin 12-vjeçar.

Detaje të reja janë zbardhur nga dosja hetimore për rastin e Arlinda Zekajt, 49-vjeçares që u vra më 25 tetor nga kunati i saj, Albert Sylaj. Dokumentet e përfshira në aktakuzën e ngritur ndaj ish-bashkëshortit të saj, Jeton Sylaj, pasqyrojnë konfliktin e gjatë familjar, kërcënimet e raportuara dhe përpjekjet e gruas për të takuar djalin e saj 12-vjeçar.

Sipas aktakuzës së Prokurorisë Themelore në Pejë, më 23 tetor 2026, Jeton Sylaj është akuzuar për veprën penale të „kanosjes“, pas kërcënimeve që, sipas deklarimeve të Arlinda Zekajt, ai i kishte drejtuar asaj përmes telefonit në dhjetor të vitit 2025.

„Do të të vras, do të të tërheq zvarrë [...] nuk do ta shohësh djalin nëse jam gjallë unë“, ishte një pjesë e kërcënimeve që 49-vjeçarja deklaroi se kishte marrë nga ish-bashkëshorti.

Aktakuza u ngriti vetëm dy ditë para vrasjes së saj.

Në dosjen e prokurorisë u përfshi deklarata që Arlinda Zekaj dha në Policinë e Kosovës më 10 korrik 2026. Ajo tregoi se gjatë martesës 13-vjeçare me Jeton Sylajn kishte përjetuar dhunë psikologjike dhe fizike.

Sipas deklarimit të saj, në vitin 2024, ajo u kthye në Kosovë së bashku me djalin, ku ndërtuan një shtëpi në fshatin Vitomiricë të Pejës. Ndërkohë, ish-bashkëshorti vazhdoi të jetonte mes Kosovës dhe Shteteve të Bashkuara të Amerikës.

Arlinda Zekaj deklaroi gjithashtu se, për shkak të nevojave të ish-bashkëshortit, kishte marrë një kredi prej 9 mijë eurosh dhe se më pas i kishte kërkuar atij të largohej nga shtëpia.

Ajo rrëfeu në polici se, pavarësisht kërcënimeve të marra në dhjetor të vitit 2025, në atë kohë nuk e kishte denoncuar ish-bashkëshortin, pasi kishte shpresuar se ai do të ndryshonte. Megjithatë, deklaroi se ndihej e rrezikuar prej tij.

Një nga shqetësimet kryesore të Arlinda Zekajt ishte humbja e kontaktit me djalin e saj. Sipas deklaratës së dhënë në polici, ajo nuk e kishte penguar të miturin të takohej me familjen e ish-bashkëshortit.

Më 20 qershor 2026, djali shkoi te familjarët e babait në Deçan, por, sipas saj, që nga ajo ditë ajo nuk mori më lajme prej tij.

49-vjeçarja deklaroi se i biri e kishte bllokuar në telefon dhe në të gjitha rrjetet sociale, duke dyshuar se kjo ndodhi nën presionin e familjes së ish-bashkëshortit.

Në dëshminë e saj, ajo i kërkonte policisë që ta ndihmonte të rikthente djalin pranë vetes.

„Djali ka shkuar te gjyshja dhe xhaxhallarët. Aniku më ka bllokuar në telefon dhe nuk dëshiron të vijë të jetojë me mua. Për këtë jam e sigurt se Jetoni po e detyron të qëndrojë te gjyshja në Deçan dhe të mos vijë të jetojë me mua. Unë i kërkoj Policisë që të ma kthejë djalin për të jetuar me mua“, deklaroi Arlinda Zekaj, sipas dosjes.

Ajo shprehur gjithashtu frikën ndaj ish-bashkëshortit dhe familjes së tij, duke kërkuar ndërhyrjen e institucioneve.

Arlinda Zekaj dha një tjetër deklaratë në Policinë e Pejës më 13 korrik 2026. Në të, ajo raportoi se tri ditë më herët kishte shkuar në shtëpinë e saj në Vitomiricë dhe e kishte gjetur djalin vetëm me dy fëmijë të tjerë.

Sipas deklarimit të saj, në momentin kur u hap dera, policia ishte e pranishme. Ajo kërkoi që të merreshin kamerat e sigurisë së banesës, duke pretenduar se i mituri ishte lënë pa përkujdesjen e duhur.

„Unë vlerësoj se lënia e fëmijës në atë mënyrë është shkelje ligjore nga babai i Anikut, Jeton Sylaj, dhe xhaxhai i Anikut, Driton Sylaj“, deklaroi ajo, sipas dosjes.

Në të njëjtin deklarim, Zekaj bëri me dije se për çështjen ishte informuar edhe Ambasada Amerikane.

Në aktakuzë u përfshi edhe deklarimi i djalit 12-vjeçar, i cili u intervistua në prani të një punonjësi të Qendrës për Punë Sociale.

Sipas dokumentit të datës 10 korrik 2026, gjatë intervistimit, i mituri deklaroi se nuk dëshironte të shkonte te nëna e tij, as për disa orë.

„Aniku, në përgjigje të pyetjes së punonjësit të QPS-së, tha se nuk dëshiron fare të shkojë te nëna e tij, as për disa orë“, thuhet në aktakuzë.

Po ashtu, në dosje u përfshi një raport psikologjik i datës 23 korrik 2026, sipas të cilit i mituri kërkoi urdhër mbrojtjeje nga nëna e tij.

Raporti evidentoi se djali shprehur dëshirën për të mos pasur kontakt me të ëmën, por nuk raportoi dhunë fizike nga ana e saj. Sipas dokumentit, ai pretendoi se nëna bënte „magji të zezë“ në katin e dytë të shtëpisë së dajave.

Në raport thuhet gjithashtu se i mituri nuk e kuptonte saktësisht kuptimin e urdhrit të mbrojtjes, pavarësisht se e kishte kërkuar, dhe se zyrtarët e pranishëm i dhanë shpjegimet përkatëse.

Në dosjen e prokurorisë u përfshi edhe deklarimi i Jeton Sylajt në polici, ku ai pranoi se i kishte drejtuar kërcënime Arlinda Zekajt, por dha versionin e tij për arsyet e konfliktit.

„Është e vërtetë se Arlindës i kam thënë fjalët 'do të të vras, do të të tërheq zvarrë', mirëpo ia kam thënë këto fjalë sepse djali im është ndier i rrezikuar“, deklaroi ai, sipas dosjes.

Sylaj pretendoi se djali ndihej i frikësuar nga nëna e tij dhe se ajo kishte shkuar te familjarët e tij në Deçan.

Këto pretendime janë pjesë e deklarimeve të palëve të përfshira në dosje dhe nuk përbëjnë, në vetvete, një konstatim përfundimtar të gjykatës.

Rasti i Arlinda Zekajt ngre pikëpyetje mbi denoncimet e saj, kërkesat për ndihmë dhe mënyrën se si institucionet i trajtuan shqetësimet e raportuara para vrasjes së saj më 25 tetor 2026.

Ndërsa Prokuroria Themelore në Pejë ngriti aktakuzë ndaj Jeton Sylajt për „kanosje“, hetimet për vrasjen e 49-vjeçares lidhen me kunatin e saj, Albert Sylaj.