Vrasja e shqiptarit në Itali, gjykata konfirmon paraburgimin e italianit

Gjykata e Forlit në Itali ka konfirmuar masën e sigurisë 'arrest me burg' për Daniele Sartinin, 29-vjeçarin nga Longiano, i cili akuzohet për vrasjen e shqiptarit Denaldo Maxhalakut, 31 vjeç, dhe fshehjen e trupit të tij. Pas seancës së zhvilluar të shtunën, më 31 tetor, gjyqtari i hetimeve paraprake vendosi të lërë në fuqi këtë masë sigurie.

Sartini ndodhet në burgun e Forlit që nga e mërkura, dhe vendimi i fundit konfirmon vazhdimin e paraburgimit.

Sipas rindërtimit të ngjarjes nga hetuesit, krimi dyshohet se ka ndodhur për shkak të një borxhi droge rreth 1.000 eurosh. Shqiptari 31-vjeçar kishte shkuar për të kërkuar shlyerjen e borxhit, por dyshohet se u qëllua për vdekje me armë zjarri nga 29-vjeçari.

Pas vrasjes, autori i dyshuar dyshohet se e hodhi trupin e viktimës në një pus, dhe më pas i vuri flakën automjetit të Maxhalakut.

Sipas Prokurorisë së Forlit, Sartini ka pranuar krimin. Rrëfimi i tij është cilësuar nga organi i akuzës si 'i plotë dhe i detajuar'.

Me konfirmimin e arrestit, 29-vjeçari do të vazhdojë të qëndrojë në burg, ndërsa hetimet për zbardhjen e plotë të rrethanave të vrasjes janë në vazhdim.